आमचे संगीत सुपरस्टार.....

आमचे संगीत सुपरस्टार..... 

मळलेल्या वाटेने सर्वजण चालतात मात्र काहीजण इतरांपेक्षा काहीतरी वेगळे करुन स्वतःची ओळख निर्माण करतात.  भंडारी हायस्कूलचे माजी विद्यार्थी  आणि माझे मित्र प्रसाद रानडे, करुणा रानडे, मानेंद्र आचरेकर यांनी संगीत क्षेत्रात वेगळी ओळख निर्माण करून स्वतः ला सिद्ध केले आहे. हे सर्वजण आमच्यासाठी संगीत सुपरस्टार आहेत. मी सुरुवात करतो प्रसाद आणि करुणा यांच्या संगीत क्षेत्रातील प्रवासाबद्दल. प्रसाद आणि करुणा यांना बालपणापासून संगीताचे धडे मिळाले आहेत. भंडारी हायस्कूलचे शिक्षक आणि आमचे गुरुवर्य ध्रुवकुमार रानडे हे करुणाचे बाबा तर प्रसादचे काका. रानडे सरांच्या मार्गदर्शनाखाली दोघांनी संगीताचे धडे गिरवले आहेत. शालेय जीवनात दोघांनीही गीतगायन स्पर्धेत अनेक पारितोषिके प्राप्त केली आहेत. प्रसाद उत्कृष्ट गायक, संगीतकार, गीतकार आहे. प्रसाद आणि करुना दोघेही तबला वाजवतात. आम्ही कणकवलीला सादर केलेल्या बाप्पा मोरया या एकांकिकेत करुणाने तबला वादन करून सर्वांना अचंबित केले होते. शालेय जीवनापासून प्रसाद आणि करुणाने संगीताची आवड जोपासली. दोघांनीही आपल्या आवडीचे रुपांतर करीअरमध्ये केले. करुणाचे शास्त्रीय गायन अप्रतिम आहे. करुणा विविध ठिकाणी आपली गाणी सादर करत असते. प्रसादही सर्व गायन प्रकारामध्ये पारंगत आहे. प्रसादच्या अनेक गाण्यांचे अल्बम गाजले आहेत. संगीत क्षेत्रातील अनेक प्रसिद्ध व्यक्तींसोबत प्रसाद गीतांच्या मैफीली करत असतो. युट्यूबवर प्रसादच्या गीतांना भरपूर प्रतिसाद मिळत आहे. प्रसाद आणि करुणा यांच्याबरोबरीने मानेंद्र आचरेकर यानेही संगीत क्षेत्रात स्वतःची ओळख निर्माण केली आहे. मानेंद्रला संगीत क्षेत्राची पार्श्वभूमी नाही. पण तरीही संगीताची आवड व निरीक्षण यामुळे मानेंद्रने संगीत भेत्रात वेगळी ओळख निर्माण केली आहे.मानेंद्र चांगला अभिनेता आहे. तो आजूबाजूच्या घटनांचे निरीक्षण योग्य पद्धतीने करतो. या सर्वांचा प्रभाव त्याच्या गीतांमध्ये दिसतो. मालवणच्या दर्यात या मानेंद्रच्या गीतात मालवणचे प्रतिबिंब दिसते. त्याचबरोबर मच्छीमार समाजाची संस्कृती, मच्छीमार समाजातील नवयुवकांनी निवडलेली रोजगाराची साधने हे स्थित्यंतर मानेंद्रच्या गीतात दिसते. त्यामुळे हे गीत अबाल वृद्धांसह सर्वांनाच आवडते. मानेंद्रचे मालवणच्या दर्यात हे गीत युट्यूबवर जबरदस्त हिट ठरत आहे. मानेंद्र सध्या विविध गाण्यांचे लेखन करत आहे. लवकरच त्याची आणखी गाणी युट्यूबद्वारे रसिकांपर्यंत पोहचतील. आमचे तीनही संगीत सुपरस्टार त्यांच्या नवीन प्रोजेक्टमध्ये बिझी आहेत. लवकरच त्यांच्याकडून संगीताची मेजवानी आम्हाला मिळणार आहे. प्रसाद, करुणा, मानेंद्र हे शालेय जीवनात अभ्यासातही हुशार होते. पण त्यांनी संगीताची आवड जोपासून संगीत क्षेत्रात करीअर केले. त्यांचा हा प्रवास संगीत क्षेत्रात करीअर करु इच्छिणाऱ्यांसाठी निश्चितच मार्गदर्शक आहे. 

संग्राम कासले, मालवण