मालवण प. स.चे विद्यालय अँप
कोरोना कालावधीत लाँकडाऊनमुळे विद्यार्थ्यांना तीन महिने घरीच रहावे लागले आहे. अशा परिस्थितीत शाळा कधी सुरु होणार असा प्रश्न निर्माण झाला होता. परंतु सोमवारी शैक्षणिक वर्ष सुरु करण्यास राज्य सरकारने परवानगी दिली आहे. रेडझोनमध्ये असणाऱ्या शाळा सद्यस्थितीत बंद राहणार असून विद्यार्थ्यांची आरोग्याच्या दृष्टिकोनातून काळजी घेऊन शाळा सुरु होणार आहेत. परंतु या कालावधीत विद्यार्थ्यांचे शैक्षणिक नुकसान होऊ नये यासाठी आँनलाईन शिक्षणाचा देखील एक पर्याय असणार आहे. विद्यार्थ्यांचे शैक्षणिक नुकसान होऊ नये यासाठी मालवण पंचायत समितीच्या टिमने विद्यालय हे अँप विकसित केले आहे. मालवण पं.स.चे गटविकास अधिकारी राजेंद्र पराडकर, सभापती अजिंक्य पाताडे, उपसभापती राजू परुळेकर, सर्व प.स.सदस्य यांच्या मार्गदर्शनाखाली तंत्रस्नेही शिक्षकांच्या टिमने विद्यालय अँप विकसित केले आहे. या अँपचे उद्घाटन जि. प. मुख्य कार्यकारी अधिकारी हेमंत वसेकर यांच्या हस्ते करण्यात आले. तिसरी ते सातवी पर्यंतचा इयत्तावार अभ्यासक्रम या अँपमध्ये सामाविष्ट करण्यात आला आहे. अभ्यासक्रमातील पाठांच्या स्मार्ट पीडीएफ बनविण्यात आल्या आहेत. अँपमध्ये आवश्यक त्या ठिकाणी पाठाची युट्यूब लिंक देण्यात आली असून इंटरनेटची सुविधा असल्यास लिंकवरून विद्यार्थ्यांना धडे अभ्यासता येणार आहेत. प्रत्येक पाठाखाली स्वाध्याय देण्यात आले आहेत. क्यूआर कोड स्कँन करुन विद्यार्थ्यांना पाठाचा अभ्यास करता येणार आहे. या अँपचा उपयोग करण्यासाठी अँपमधील पाठाचा भाग डाऊनलोड करून घ्यावा लागणार आहे. यानंतर आँफलाईन पद्धतीने विद्यार्थी पाठाचा अभ्यास करु शकतात.विद्यालय अँप बनविण्यासाठी अमर वाघमारे, गुरूनाथ ताम्हणकर, विनीत देशपांडे, दिनकर शिरवलकर, परशुराम गुरव, भागवत आवचार, नंदकिशोर हळदणकर यांनाही मेहनत घेतली आहे. कोरोनाच्या पार्श्वभूमीवर जास्तीत जास्त विद्यार्थ्यांनापर्यंत विद्यालय अँप पोहचल्यास विद्यार्थ्यांना त्याचा भरपूर फायदा होणार आहे. परंतु ज्या ठिकाणी इंटरनेटची सोय नाही अशा ठिकाणी अन्य माध्यमाद्वारे हे अँप पोहचवावे लागणार आहे. त्यासाठी मालवण प. स. टिम, तालुक्यातील शिक्षक निश्चितच मेहनत घेतील. मालवण पंचायत समितीने राबवलेला हा शैक्षणिक उपक्रम कौतुकास्पद असून यापुढेही विद्यार्थ्यांचा सर्वांगिण विकास साधणारे उपक्रम राबवावे अशी अपेक्षा आहे.
संग्राम कासले, मालवण
टिप्पण्या
टिप्पणी पोस्ट करा