सैनिकहो तुमच्यासाठी

सैनिकहो तुमच्यासाठी

  आमची शाळा भंडारी ए. सो. हायस्कूल व ज्युनियर कॉलेजच्या विद्यार्थीनी दरवर्षी भारतीय सैनिकांसाठी राख्या बनवून पाठवतात. या कार्यक्रमासाठी दरवर्षी प्रा. पवन बांदेकर सर आर्वजून फोन करून भंडारी हायस्कूल येथे बोलवतात. शुक्रवारी कार्यक्रमासाठी सकाळी 11 वाजता मी भंडारी हायस्कूल येथे पोहचलो. कोरोना आजाराची पार्श्वभूमी असतानाही विद्यार्थिनींचे गट बनवून 10,103 राख्या बनविण्यात आल्या. या राख्या पाठविण्याचा कार्यक्रम मालवण नगरपालिकेचे मुख्याधिकारी जयंत जावडेकर यांच्या उपस्थितीत पार पडला. यावेळी प्रा. व्ही. जी. खोत, पर्यवेक्षक हणमंत तिवले, प्रा. पवन बांदेकर, ग्रंथपाल प्रफुल्ल देसाई, प्रा. देवेंद्र चव्हाण, प्रा. गुरुदास दळवी, प्रा. प्रभुदास आजगावकर, प्रा. गणेश सावंत, प्रा. सुनंदा वाईरकर, प्रा. वैभवी वाक्कर, प्रा. सौ. शिल्पा प्रभू, शिक्षिका चिन्मयी कोयंडे आदी व तसेच विद्यार्थिनी उपस्थित होत्या. या उपक्रमासाठी संस्थेचे अध्यक्ष विजय पाटकर, चेअरमन सुधीर हेरेकर ऑनररी जनरल सेक्रेटरी साबाजी करलकर, टेक्नोव्हा मुंबईचे मालक मंगेश कुलकर्णी यांचे मार्गदर्शन असल्याचे प्रा. बांदेकर यांनी सांगितले. भारतीय सैनिकांना राख्या पाठवण्याचा कार्यक्रम 12 वाजता संपला पण मुसळधार पाऊस असल्यामुळे भंडारी हायस्कूलच्या टीव्ही हॉलमध्ये थांबलो. आम्ही विद्यार्थी वरच्या हॉलला टीव्ही हॉल म्हणायचो. कारण लहान असताना या हॉलमध्ये आमच्यासाठी खास टीव्ही लावला जायचा. पण आता या टीव्ही हॉलचे रूप पूर्णत: पालटले आहे. बांदेकर सरांच्या बोलण्यातून असे लक्षात आले की आजी माजी विद्यार्थ्यांनी हाँलचे रंगकाम केले आहे. त्याचबरोबरीने हॉलमध्ये संत, समाजसुधारक यांच्या प्रतिमा अतिशय सुंदर पद्धतीने लावण्यात आल्या आहेत. त्यामुळे या हॉलचे वेगळे रूप आता दिसून येते. मुसळधार पावसामुळे बराच वेळ भंडारी हायस्कूलच्या पॅसेजमध्ये थांबता आले. भंडारी हायस्कूलमधील दहावी, बारावीचे कट्टे पाहताना जुन्या आठवणींना उजाळा मिळाला. सध्या कोरोनामुळे हे पॅसेज व कट्टे रिकामे आहेत. लवकरच कोरोनाचे संकट टळून शाळा पूर्ववत सुरू होतील व विद्यार्थांच्या येण्याने सारे कट्टे बोलू लागतील

संग्राम कासले, मालवण