नवे वर्ष नवी उमेद

आज 1 जानेवारी 2021 नवीन वर्षाचा पहिला दिवस. भंडारी हायस्कूलमध्ये असताना सामंत सर आम्हाला आवर्जून सांगायचे नवीन वर्षात नवीन संकल्प करावा. सरांच्या विधानाचे आज स्मरण होत आहे. 2020 हे वर्ष कोरोना साथ रोगामुळे लक्षात राहिले. संपूर्ण वर्ष कोरोना साथीशी लढण्यात गेले. नागरिकांनी मानसिक कणखरपणा दाखवत कोरोनाशी सामना केला. कोरोनाविरुद्धची लढाई अजूनही सुरुच आहे. कोरोनाने आपल्याला बरच काही शिकवले. रोजचा दिवस हा नवीन काहीतरी घेऊन येत असतो. या दिवसात सु:ख, दु:ख, यश, अपयश, आशा, निराशा असे सारे असते. या सर्वांचा थोडा बहुत आनंद लुटतच आपल्याला जीवन जगाव लागणार आहे. कोरोनामुळे प्रत्येकाला एका दिवसाचे महत्व उगमले असेल. त्यामुळे नवीन वर्षातला प्रत्येक दिवस आनंदाने उत्साहाने जगूया. अगले दिन जो होगा सो देखा जायेगा! या उक्तीप्रमाणेच नवीन वर्षाचे आनंदाने उत्साहाने स्वागत करुया. कोरोनाने मला वर्षभरात बरच काही शिकवल. किंबहुना अनेकांकडून मी शिकत गेलो. रोजगाराचे साधन गमावलेला कणकवली येथील माझा मित्र उमेश बुचडेने वडापावची गाडी उभी करुन परिस्थितीसमोर न झुकण्याचा आदर्श घालून दिला. मुंबई येथील अभिनेता रोहन पेडणेकर याने कठीण काळात सुक्या मच्छीचा व्यवसाय करुन परिस्थितीसमोर लढल पाहिजे याचा वस्तुपाठ घालून दिला. कोरोना काळात रोजगाराची समस्या निर्माण झाल्याने अनेकांनी स्वतः धडपड करुन छोटासा का होईना पण स्वतः चा व्यवसाय सुरु केला. वर्षभरातील अनेक उदाहरणे बरच काही शिकून गेली. नवीन वर्षात बरेच नवे संकल्प केले आहेत. ते पूर्ण करण्यासाठी दिलसे प्रयत्न होणार आहेत. नवीन वर्षात सकारात्मक दृष्टिकोनातून प्रत्येक संकल्प पूर्ण करण्याचा माझा संकल्प असेल. 2021 मध्ये विविध विषयावरच वाचन करायचे आहे. कारण गेल्या काही वर्षात म्हणाव तस वाचन झालेले नाही. त्याचप्रमाणे जास्तीत जास्त परीक्षांना बसायचे आहे. भारतीय संविधानातील मूल्यांचा प्रबोधनातून प्रसार करायचा आहे. यासारखे अनेक संकल्प पूर्ण करायचे आहेत. लवकरच नवीन संकल्प पूर्ततेच्या माध्यमातून भेटत राहू.