आचरेत आजपासून मैदानी खेळांची प्रशिक्षण कार्यशाळा : अश्वमेध स्पोर्ट्स अकॅडमीचे आयोजन

अश्वमेध स्पोर्ट्स अकॅडमीच्या वतीने १० मेपासून आचरा हायस्कूलच्या मैदानावर विविध मैदानी खेळांची (अथलेटिक गेम्स) कायमस्वरूपी प्रशिक्षण कार्यशाळा सुरू होत आहे. अथलेटिक खेळांमध्ये विद्यार्थ्यांची रुची वाढावी, या हेतूने अकॅडमी सुरू करण्यात येत आहे. त्यामुळे आचरा दशक्रोशीतील जास्तीत जास्त मुलांनी कार्यशाळेत सहभागी व्हावे, असे आवाहन करण्यात आले आहे. 

आचरा हायस्कूलच्या मैदानावर तज्ज्ञ प्रशिक्षकाच्या मार्गदर्शनाखाली विद्यार्थ्यांना सखोल प्रशिक्षण दिले जाणार आहे. ही कार्यशाळा कायमस्वरूपी सुरू राहणार असून यात प्रामुख्याने धावण्याचे सर्व प्रकार, लांबउडी, उंचउडी, गोळाफेक, भालाफेक या खेळ प्रकारांचे शास्त्रोक्त प्रशिक्षण मिळणार आहे. ज्या विद्यार्थ्यांना अकॅडमीमध्ये प्रवेश घ्यायचा असेल त्यांनी सिद्धेश आचरेकर (8275649254) यांच्याशी संपर्क साधावा. कार्यशाळा मे महिना कालावधीत सकाळी 7 ते 9 या वेळेत होईल. जूनपासून सायंकाळी 4 ते 6 या वेळेत घेतली जाणार असून ओंकार धुरी हे मुलांना प्रशिक्षण देणार आहेत. 

मुलांसह पालकांमध्ये असणारा खेळाविषयीचा न्यूनगंड दूर करण्याचा आमचा मानस आहे. शाळेतील मुलांना खेळायला पुरेसा वेळ मिळत नाही. शालेय जीवनात अभ्यासापुढे खेळाला दुय्यम स्थान दिले गेल्याने क्रीडा स्पर्धांमध्ये मुले मागे राहतात. हे चित्र बदलण्यासाठी शालेय स्पर्धासह तालुका, जिल्हा, विभाग, राज्य ते राष्ट्रीय स्तरावर झेप घेण्याच्या दृष्टीने मुलांकडून तयारी करून घेतली जाणार आहे. यातून ग्रामीण भागातील मुलांमध्ये स्पर्धात्मक खेळासाठी लागणारी मानसिकता, शारीरिक क्षमतेचा असलेला अभाव नक्कीच दूर होईल, असे अश्वमेध स्पोर्ट्स अकॅडमीचे अध्यक्ष सिद्धेश आचरेकर यांनी प्रसिद्धीपत्रकात म्हटले आहे.